تأثير المقارنة على ثقة الطفل، وعلى نظرة الأم لطفلها

✨️أول حاجة بتكسر ثقة الطفل بنفسه حتى لو كانت بنظرة أو بجملة سريعة زي شايف ابن خالتك بيعملها إزاي؟

الطفل بيكون سامع وحاسس بكل مقارنة.. حتى لو مش بيعبر. 

و بيبدأ يشعر إنه أقل، إنه متأخر، إنه محتاج يبذل مجهود مضاعف علشان يبقى زي غيره، وده بيخليه ينسحب أكتر، ويرفض يجرب، ويخاف يغلط.

✨️لما تفكري تقارني أولادك .. عينك تلقائيا بتدور على النواقص. 

بتشوفي ابنك ناقصه ايه، متأخر في ايه، مش بيعرف يعمل ايه زي باقي الأطفال. 

فتبدئي تقلقي، بدل ما يتدفق الحب والفهم لأولادك. 

وده بيتعبك نفسيا، و يحسسك بالذنب والتقصير، ويخلي تواصلك بأولادك  مليان توتر وضغط بدل ما يكون مليان احتواء وهدوء.

✨️المعركة بتنشأ لما تسألي السؤال الغلط: هو ليه مش زي غيره؟ ليه مش بيتكلم زيهم؟ ليه مش بيلعب زيهم؟ ليه مش بينجز بسرعة زيهم؟ والسؤال ده عمره ما كان ليه إجابة تريح، بالعكس بيزود الوجع..و القلق و التوتر.

✨️ بدل ما تسألي ليه مش زي غيره، نسأل: ايه المختلف والمميز فيه؟ ايه الحاجة اللي بيحبها وبيبدع فيها؟ ايه طريقته الخاصة في التعبير عن الحب والفرح؟ ايه الحاجة اللي بتخليه هو على حقيقيته مش زي اي حد؟

✨️لما تسألي ايه المميز في أولادك، عينك هتبدأ تشوف حاجات عمرك ما خدتي بالك منها. 

هتشوفي ذاكرته القوية في التفاصيل، حبه الكامل لك و قدرته علي التواصل معاك  .. او حبه النظام، تركيزه العالي في الحاجة اللي بيحبها، صدقه وبراءته، طريقته المختلفة في وصفه العالم المحيط به .

✨️ممكن طفلك يكون عنده طيف التوحد الخفيف هو مش نسخة ناقصة من طفل تاني، هو نسخة أصلية كاملة بتركيبة مختلفة. محتاج أم تشوف تميزه قبل ما تدور على تقصيره، وتحتفل بتقدمه الصغير قبل ما تقارنها  بطفل تاني.

كل مرة هتبطلي فيها تقارني، انتي بترجعيله حتة من ثقته بنفسه، وكل مرة هتشوفيه بعين المميزات مش النواقص، انتي بتديله مساحة يكبر ويتطور وهو مطمن انه محبوب زي ما هو، مش محبوب لما يبقي شبه حد تاني.