مع كل موقف بينقلك بين انتصارات أولادك الصغار في سماحك ليهم بتنفيذ رغبتهم و بين رفضك لطلباتهم وانفجارهم في نوبات غضب.

مع كل موقف بتقفي قدام رفض أولادك و تحديهم لك و قدرتهم العجيبة في سن صغير يقولوا في وشك لأ بكل قوتهم ..بتكوني محتارة هل ده عناد ؟ و لا ده حقهم الطبيعي في الاستقلال و إثبات قدراتهم ؟

 ✨️أنت بتعشقي الرقة الحلوة لأولادك و هما بيسمعوا كلامك ، ولكن في بعض الأحيان انك تتقبلي لأ منهم ..بيكون صعب عليك .

علشان كدة مهم تبدئي رحلة الأمومة الحقيقية اللي هتساعدك تحبي أولادك حب غير مشروط بسماع الكلام لأن ده هيساعدك جدا تهدي من جواك و تقدري تميزي امتي أولادك بيقولوا لأ عناد و امتي رغبة طبيعية في الأستقلال ؟

✨️ أنت مش لوحدك! 

ما بين سن 3_ 7سنوات  تحدث تغييرات كبيرة.

 من اهم السنوات اللي بيطور فيها أولادك إحساسًا قويًا بالذات. 

استفيدي من اهم مراحل النمو و التطور لأولادك في فهمهم و أكتشاف شخصيتهم و قوي علاقتك بيهم .

✨️ وفهم الفرق بين العناد والاستقلال الصحي هو المفتاح لتقوية رابطة المحبة بينكم وتربية الطفل الواثق اللي بتحلمي به .

✨️التمييز بين العناد والاستقلال:

✨️ العناد غالبًا ما يكون تحديًا للقواعد أو الطلبات. 

✨️الاستقلالية تعني الرغبة في القيام بالأشياء بأنفسهم 

حتى لو استغرق الأمر وقتًا أطول أو لم تكن مثالية زي ما انت هتعمليها لهم بيصروا يعملوها لنفسهم .

مواقف عملية ممكن تقابلك

✨️من المحبط جدا ان يرفض طفلك مساعدتك في ارتداء حذائه للمرة الخامسة مثلا و الوقت بيخلص و صبرك بيخلص وممكن في اللحظة دي تشكي في نفسك والأمومة و أزاي مش قادرة تسيطري علي موقف بسيط ..لكن بطمنك أن كل شك جواك طبيعي طول ما انت لسة مش عارفة الفرق بين العناد و الاستقلال ..بمجرد ما تقدري تفرقي المواقف هتكوني واثقة و سعيدة جدا و انت مدركة قد ايه الوقت و الصبر علي تنمية قدرات أولادك هتشكل شخصية واثقة و مستقلة .

في مواقف تانية هتقابلك 

 ✨️خلال سنوات نمو اولادك تدور حول اكتشاف نفسهم ومعرفة ايه اللي بيحبوه وايه اللي مش بيحبوه.

مع الأخذ في اعتبارك إنه أولادك في السن الصغير مش بيقدروا علي التعبير بشكل صحيح عن مشاعرهم و رغباتهم .

تلاقيهم فجأة بيجروا منك في مكان عام أو بيمدوا ايدهم يجيبوا حاجة يستكشفوها و ساعات المواقف تكون محرجة و مفاجئة ..مش عارفين يطلبوا في كل موقف لوسمحت محتاج اجرب و اشوف نفسي هعرف و لا لأ 

لكن خلاص انت دلوقتي فهمت انه طبيعة المرحلة اكتشاف نفسهم و رغباتهم

 ✨️بدلاً ما ترفضي و تقاوميهم ..و تقولي جمل (لا متجريش خليك جنبي )

جربي (خلينا نمشي مع بعض و نعدي الطريق سوا ..لما نعدي الطريق ممكن تجري ). 

✨️بدل ما تمسكش و ممنوع و لأ علي كل حاجة ..وفري بدائل و خصصي مساحة آمنة للحركة و الاكتشاف و استخدمي جمل فيها كلمة مناسب أو مش مناسب بدل لأ 

لأن كثرة استخدامك كلمة لأ بتعلم أولادك يكرروها حتي لو مش قاصدين معناها .

✨️اعرضي الخيارات في المواقف اللي ينفع فيها يختاروا. «تحب تشرب في الكباية الأزرق أو الأحمر؟» 

في الأكل و اللبس و الألعاب. 

✨️اعترفي بمشاعرهم بيقلل جدا من نوبات الغضب : شايفة أنك مضايق ان وقت اللعب خلص ..قد ايه صعب توقف اللعب..لكن هنرجع مرة تانية نلعب في النادي .

✨️ ركزي على الإيجابيات: بالرغم من اوقات المقاومة و الأصرار علي رأيهم تذكري دايما صفاتهم الحلوة و اتكلمي عنها معاهم ده أساس لعلاقة قوية وواثقة ومحبة بينكم.

✨️ضعي حدودًا واضحة : في مواقف غير قابلة للتفاوض. اشرحي*لماذا* توجد القاعدة محددة و أهميتها و تقبلي مشاعر أولادك لو غضبوا و اكدي لهم احترام الحدود مهم .

مع الوقت و علاقتك القوية بأولادك بيتعاونوا جدا.

✨️ركزي على التعاون: لما اولادك ياخدوا وقت طويل قوليلهم يلا نعمل مع بعض و نتعاون مثلا لارتداء حذائك.

 يمكنك ارتداء واحدة بنفسك .. وأساعدك في التانية .

✨️مع تطوير مهارة الأستقلالية مهم جدا احتفالك بالجهد المبذول و تشجيع المحاولة ورا التانية حتي لو معرفوش يعملوا متخليش فرحتك و تشجيعك فقط بالنتيجة النهائية لأي هدف في حياتهم 

✨️اختاري معاركك:  مش كل خلاف يكون صراع على السلطة بينكم ..حددي أولويات الأمور المهمة تكون حدود و باقي المواقف أختيارات. 

لأن الصراعات على السلطة مين يمشي كلامه ممكن تجعلك مرهقة باستمرار والتشكيك في أن مفيش فايدة مع أولادك.  

من خلال فهم الفرق بين العناد والاستقلال الصحي، يمكنك اجتياز المواقف الصعبة بمزيد من الثقة ورعاية أولادك لتحقيق شخصية قوية ومرنة مع الشعور بالقدرة على استكشاف عالمهم باستقلال مناسب لمرحلتهم العمرية .