• أم جديدة و ربنا رزقك أولاد و الحمد لله فرحانة بيهم و عايزة تربيهم أحسن تربية، هل بتفكري ايه هي أحسن تربية ؟

✨️أكيد فكرتي في أسلوب تربيتك و اخدت قراراتك ايه اللي حابة تعمليه مع أولادك تاني و ايه لا يمكن تكرريه مع أولادك .

✨️و اكيد بتسمعي نصائح من ماما وبابا طول الوقت لأن التربية زمان كانت تربية أولاد الأصول و الأهتمام بالأنضباط و القيم و الأخلاق و التربية اللي بتركز علي تأسيس الأولاد للنجاح في الدراسة و التعليم .

✨️و لما تفكري في كلامهم و نصايحهم تحسي انك متفقة معاهم في نفس الهدف و انك عايزة توصلي أولادك فعلا للأنضباط و القيم و الأخلاق و النجاح ..و لكن جواك صراع و أختلاف كبير معاهم في الطريقة و الأسلوب اللي بيعتمد علي الأوامر و التوجيهات و الانتقاد للطفل و الشدة و الصرامة و الضرب و كبت المشاعر وعدم الاهتمام بنفسية و بناء شخصية الطفل علي حساب التركيز علي الأداء و الإنجاز و السلوك الخارجي .

طيب تعملي ايه في الصراع النفسي اللي جواك ما بين التربية القديمة و التربية الحديثة لأولادك  ؟

✨️ هتلاقي قدامك متاح كتب و كورسات و معلومات كتير عن التربية الحديثة أو التربية الإيجابية أو التربية بالحب و الحزم أو التربية بالمنتسوري .. و مسميات مختلفة و جذابة جدااا هتبدأ تشدك تتعلمي و انت جواك يقين كبير بأهمية التعلم لتربية أولادك و ان التربية مش بالصدفة و لا بالفطرة اللي حصل فيها تشويه من جيل لجيل .

✨️و حقيقي عايزة أكد لك هنا أن شعورك الداخلي و يقينك اللي بيوجهك تتعلمي هو صوت حقيقي هيوجهك صح لو بدأت الاول من جواك بمنظور حقيقي لأولادك هيسمح لك تكتشفي أنسب أسلوب تربوي ليهم و أزاي تقدري تستفيدي من دمج مدارس مختلفة للتربية حسب احتياجات أولادك .

✨️هتكتشفي و انت بتتعلمي و بتطبقي مع أولادك الطرق الحديثة الإيجابية في التربية أن لها اصل في القرآن والسنة النبوية فلو رجعت لتوجيه قلبك لله في تربية أولادك هيفتح عليك بأسلوب خاص مناسب لك ولأولادك يمكنك من التطبيق للأساليب التربوية اللي يوصل لنتيجة حقيقية فعلاً .

✨️ولو هنرجع لسؤال ايه هي أحسن تربية ؟

هقولك التربية اللي توصل أولادك لأحسن تقويم جسدي و نفسي و عقلي و روحي بالطرق المناسبة ليهم .

✨️التربية مش طريقة أيجابية تماما نتوجه ليها بتعلق و لا طريقة سلبية نرفضها تماما ولا يوجد اسلوب واحد يناسب كل الأطفال .

✨️يعتمد النهج الأكثر فعالية للتربية على عوامل مختلفة أهمها :

1 : التوجه لله أولاً و أخراً هو مدبر الأمر يفتح لك السعي و الأخذ بالأسباب و التعلم المناسب لكل احتياجات أولادك لتحقيق أحسن تربية ليهم بإذن الله هو اللي خلقهم و هو اللي بيده هدايتهم.

2: أمومة حقيقية تضمن لك منظور حقيقي لاكتشاف أحسن تربية لأولادك بدل التوقعات و الصور المثالية المرهقة لك ولأولادك و توصل لأولادك حب غير مشروط و تقوي علاقتك بيهم للتعاون و التفاهم و الأحترام .

3: توظيف كل الموارد المتاحة في البيئة المحيطة بأولادك حسب سنهم و مرحلة نموهم لتطوير مهاراتهم الشخصية .

4: التعلم لمهارات الذكاء الاجتماعي والعاطفي لتنمية الوعي الذاتي للأولاد والتعامل السليم مع المشاعر لانها الأساس للوقاية من الأضطرابات النفسية ومشاكل العلاقات 

5: تمكين الأولاد من حريتهم و الأستقلال في اتخاذ القرار المسؤول بعد توضيح الاختيارات و تحمل العواقب لأختيارهم .

6: مش معني التربية الإيجابية إنه مش هيقابلك سلبيات مهم جدا تقبل الأخطاء و التحديات و الصعوبات و الأنتكاسات من قلبك فعلا لأن اللي في قلبك بيوصل لقلب أولادك و هيتحكم في النتيجة النهائية للتربية .

✨️وعلشان تنجحي في تربية أولادك هتكتشفي انك محتاجة تكوني قدوة ليهم وقد ايه هتستمتعي انك تكتشفي نفسك من اول وجديد معاهم و تطوري من مهاراتك الشخصية المطلوب يتعلموها و تحققي نتيجة مع نفسك و نتيجة مع أولادك و النتيجة دي حرفياً بتحقق هدف أعمار الأرض و ده أرقى هدف للتربية .