ايه مشاعرك لما يبدأوا يبعدوا عن البيت و يقضوا وقت كبير برة ؟

الفترة دي بيكون اغلب وقت الولاد خاصة وقت الدراسة برا البيت مع اصحابهم بين المدرسة و الدروس و التمارين 

ازاي تحافظي على علاقتك بيهم و تكوني عارفة اصحابهم و يحكو لك اللي بيحصل معاهم بدون ما تكوني  رقيبة بخنقة ولا تسيب يسبب انحراف و مشاكل .

✨️ممكن تحققي معادلة النجاح في تربية أولادك من خلال ” التوازن بين الثقة و التحكم في سنوات المراهقة “

 بيواجهك التوتر في سنوات المراهقة 

لان من منظورك أولادك بيكبروا و بياخدوا حرية في الحركة برة البيت .

✨️لكن لما تفهمي منظور المراهقين ممكن يهدي التوتر و يساعدك في التواصل مع أولادك .

*  بيسعى المراهق بشكل طبيعي إلى الاستقلال والاستقلالية لأنه اهم أحتاج في مرحلة المراهقة 

 ياخدوا قراراتهم الخاصة وتجربة الحياة بأسلوبهم الخاص . 

 لو لم يتم تقبلهم ده هيدفعهم بعيد عنك ويقودهم إلى إخفاء الأمور اللي بيمروا بيها .

*  تأثير الصداقات مهم جداً خلال فترة المراهقة.

  غالبًا بيعطوا الأولوية لآراء أصدقائهم .

 إذا حاولت تحديد يصاحبوا مين أو انتقاد أصحابهم ..للأسف هيزيد بينكم العناد و هيضر علاقتك بيهم .

لما اولادك يخافوا من الحكم عليهم و على أصحابهم بيخليهم يترددوا في مشاركة أحداث حياتهم معاك لأنهم هيسمعوا منك محاضرات أو هيتعاقبوا.

  أولادك في مرحلة المراهقة بحاجة إلى الشعور بالأمان و الثقة بك.. حتى لما يرتكبوا أخطاء.

✨️أزاي تبني علاقة الثقة مع أولادك ؟

دايما بأكد المراهقة حصاد ما تم غرسه في الطفولة ..مهم مراجعة علاقتك بأولادك و تقويتها من خلال👇 

 *التركيز على التواصل 

 و إنشاء مساحة آمنة أنك موجودة للاستماع بدون إصدار أحكام. 

أكدي لأولادك أنك عايزة تفهمي وجهة نظرهم حتى لو كنت مش موافقة عليها. 

بدل سوء الظن و الأحكام السلبية عليهم أو التحكم في قراراتهم و أختياراتهم.

 * أسأليهم أسئلة مفتوحة بدلاً من سؤال محدد «يومك كان كويس النهاردة؟» 

جربي «ايه أفضل جزء من يومك؟» أو «ايه هو الموقف المهم بالنسبالك في اليوم؟»

 * الاستماع بتركيز و اهتمام بدون  عوامل التشتيت (الموبايل اوالكمبيوتر او التلفزيون)  و اسمعي علشان تفهمي أولادك و يا سلام تحددي وقت خاص لكل واحد من اولادك علشان يشبع من التركيز و الأهتمام بالاستماع له .

* احترمي خصوصيتهم  

  تجنبي التطفل و قاومي الرغبة في التحقق باستمرار من أجهزتهم أو منصات السوشيال ميديا بدون علمهم لأن منين هتبني الثقة و تعملي  تصرف معناه ان مفيش ثقة فيهم .

* بناء علاقات مع أصدقائهم 

 من خلال مناسبات وفرص للترحيب بأصدقاء أولادك. 

تعرفي عليهم و أظهري اهتمام حقيقي بدون مبالغة أو تكلف لأن المراهقين حساسين جدا ..تعاملي بصدق و تقبل و لطف ..هيفتحولك قلبهم و يتكلموا معاك .

 *  وضع القواعد التعاونية أشركي اولادك المراهقين في وضع القواعد والعواقب..ده بيحملهم المسؤولية ..من خلال أجتماعات العيلة و التركيز علي التواصل و الحوار اللي يوصل لحل المشكلات بينكم .

 *  ركزي على القيم المهمة و أكدي عليها في سلوكياتك (مثل الصدق والاحترام والمسؤولية).

* اختاري معاركك علشان مش كل موقف يكون فيه عناد و مقاومة ..اسمحي بمساحة حرية و استقلالية تامة زي لبسهم و اكلهم و ذوقهم و اهتمامتهم و مساحة من التفاوض و الاختيارات المتاحة  و مساحة خط أحمر من احترام القواعد و الحدود. 

 * أظهري الاهتمام بهواياتهم وأنشطتهم و احضري مناسبتهم الخاصة أو حفلاتهم أو عروضهم الرياضية.

*  ركزي على الإيجابيات

  اقفشيهم وهما حلوين و اعترفي بسلوكياتهم وإنجازاتهم الإيجابية ده بيعمل تعزيز لنقاط قوتهم وتطويرها .

 * احتفلي بنجاحاتهم و بإنجازاتهم كبيرة  أو صغيرة و الأهم الاحتفال بمجهودهم المبذول في كل خطوة و تقدير كل محاولة .

✨️هل بناء علاقة ثقة يعني تسيب و أهمال ؟

ابداً بناء الثقة هو الأساس للتوازن المطلوب بين التحكم في أولادك و بين أهمال متابعتهم

✨️” بناء الثقة لا يعني عدم متابعة “

 في أشارات بتنور بلون أحمر علشان تنبهك توقفي و تراجعي مع أولادك أن الاشارات تستدعي تدخلك 👇

* تغييرات مفاجئة في السلوك و تحولات جذرية في المزاج أو أنماط النوم أو الشهية للأكل  أو الأداء الأكاديمي في المدرسة.

* الانسحاب من العائلة والأصدقاء و العزلة عن المشاركة الاجتماعية المعتادة.

*  السلوك اللي فيه تعمد إخفاء الأشياء أو الكذب .

* التغييرات في الصداقات و الارتباط بمجموعة جديدة من الأصدقاء اللي سلوكهم فيه شبهات و مشاكل .

* علامات الاكتئاب أو القلق و مشاعر الحزن أو اليأس أو القلق المفرط لمدة طويلة .

* الحديث عن الانتحار أو إيذاء النفس او ذكر للرغبة في إيذاء أنفسهم يجب أن يؤخذ على محمل الجد.

✨️أزاي يكون تدخلك لمساعدة أولادك فعال؟

✨️ثقي في شعورك الداخلي إذا كان  شعور بوجود خطأ ما..فلا تتجاهلي العلامات المحذرة و اقعدي مع أولادك و اسأليهم علشان تفهمي منهم ايه اللي بيحصل معاهم ؟

ايه اللي مفتقدينه وصلهم للسلبيات اللي بيمروا بيها ؟

ايه اللي محتاجينه للدعم و المساعدة؟

✨️اطلبي المساعدة المتخصصة في حال كان صعب عليك تصحيح الوضع مع أولادك  زي طلب اسنشارة معالج نفسي أو مستشار تربوي  يمكنهم تقديم التوجيه والدعم بإذن الله .

✨️أعيدي تقييم الحدود إذا لزم الأمر و استدعي الموقف لتعديل حدودك و الثقة الممنوحة لأولادك وزيادة الإشراف لحمايتهم مع التأكيد ان دي مرحلة لتثبيتهم علي مسار يسلمهم من المشاكل و يستعيدوا الثقة من جديد.

لأن بناء علاقة ثقة مع اولادك المراهقين عملية مستمرة و قابلة للتقييم و المراجعة لتحقيق التوازن بين أحتياجهم للنمو و الاستقلال و مساحة من الحرية و في نفس الوقت المتابعة للتأكد من ان أشباع أحتياجهم للأستقلالية بيوصلهم لنتيجة إيجابية و تحقيق التوازن بيحتاج الصبر والتفهم والاستعداد لتكييف أسلوب التربية مع أحتياجات أولادك  وتلبية التوقعات بمعيارواضح للثقة المتبادلة معاهم بتكون أساس قوي يساعدهم في التغلب على تحديات المراهقة مع الحفاظ على علاقة قوية معاك .