أمومة بدون ضغط وتوقعات غير منطقية

المقدمة

أسرع طريق لفشلك كأم، هو  أنك تسعي بكل طاقتك انك تكوني مثالية

لإن ببساطة انتي بتكوني عاملة زي اللي بتحلم بالمستحيل

فـ عمرك ماهتحققيه، وهيفضل احساس التقصير ملازمك واللي هيتحول لإحباط

قبل مشارك معاك نصائح عملية ومجربة لتقليل إحساس الضغط اللي بنحس بيه مع أولادنا

محتاجة تكوني فاهمة إن جزء كبير من الضغط اللي بتحسي بيه مش بسبب إنك أم
ده بسبب الأفكار المغلوطة اللي اتزرعت في دماغك عن فكرة الأمومة 

وده اللي بيخليكي تحسي طول الوقت بالتقصير، وبتقارني نفسك بغيرك، ومش بتقدري أي مجهود بتعمليه 

لما تبطلي تجري ورا فكرة الأم المثالية 

هتحسي بالحرية، والأمومة هتتحول من ضغط لنعمة بتشكري ربنا عليها كل يوم 

دلوقتي انتي مستعدة تتعرفي على 7 طرق فعالة هتخليكي تعيشي تجربة أمومة حقيقة خالية من الضغوط والتوقعات غير المنطقية

1. ركزي مع الإشارات 

مش لازم توصلي لمرحلة الانفجار عشان تكتشفي إنك تحت ضغط

جسمنا دايمًا بيبعتلنا إشارات… بس أوقات كتير بنتجاهلها علشان “نعدّي اليوم”.

اعترافك بوجود المشكلة هو أول خطوة للخروج من دوامة الضغط

ادي لنفسك نص ساعة، وفكري إيه العلامات اللي بتظهر عليكي

هل فيه عصبية زيادة، فقدان شغف، تعب جسدي؟ 

واكتبي الأعراض دي في نوت وابدأي ابحثي عن حل لكل مشكلة فيهم 

2. اعملي خطة طوارئ

مش كل يوم بيكون مثالي.
فيه أيام بتصحي فيها، مش قادرة حتى تقومي من على السرير 

علشان كده، حضّري لنفسك خطة طوارئ بسيطة:
٣ حاجات بس، لو عملتيهم… اليوم هيعدي بسلام 

ممكن خطة الطوارئ تكون (هحضر الفطار للأولاد – هوديهم المدرسة – هحضر غدا )
اكتبيهم في نوت صغيرة، وسيبيها على التلاجة أو جنب السرير عشان متنسيهمش

3. اتصالحي مع العشوائية والكركبة

مش لازم البيت يلمع علشان تبقي أم شاطرة.
خصوصًا لما بكون عندك أطفال كتير 

بدل ما تعيشي في حالة مطاردة مستمرة للترتيب والتنظيم،
تصالحي مع فكرة إن طبيعي يكون فيه قدر من عدم النظام 

ده هيساعدك تكوني أهدى، وإحساس الضغط هيقل 

4. خدّي وقت لنفسك… حتى لو ١٠ دقايق

انتي مش آلة.
وكل ما تفضّلي تيجي على نفسك، التمن اللي هتدفعيه بعدين… هيكون أضعاف.

عشان كده مهم تدي لنفسك وقت حتى لو صغير كل يوم 

مش لازم تعملي فيه حاجة كبيرة 

 ممكن تبقى كوباية قهوة وانتي بتتفرجي على فيلم بتحبيه من غير مقاطعة،
أو ١٠ دقايق سكوت، من غير ماتسمعي كلمة “ماماااااااااااا!”

5. ابني نظام دعم

الضغط بيزيد لما كل حاجة في البيت بتكون معتمدة عليكي.

عشان كده لازم يكون حواليكي نظام دعم يسندك.
ناس تقدري ترجعي لهم وقت الضغط

يسمعوكي، ويفكرو معاكي في حلول لمشاكلك، ويشيلو معاكي جزء من الحمل 

6. اتعلمي تفوضي بعض المهام 

في حاجات ممكن غيرك يعملها، ومش هيكون فيه فرق في النتيجة النهائية 

مشوار صغير، ترويق أوضة، تحضير أكلة 

كل دي مهام لو فوضتيها لحد، هتوفر معاكي وقت ومجهود 

وده مش تقصير منك .. بالعكس انتي بتوفري طاقتك ووقتك للحاجات اللي مينفعش حد غيرك يعملها

7. علّمي ولادك يعتمدوا على نفسهم

لما تعملي كل حاجة بدالهم، انتي نتي بتعطّلي نموهم وبتربي شخصيات اعتمادية

ابدأي من التفاصيل الصغيرة:
ترويق الأوضة، تحضير اللبس، تسخين أكلة 

 وده كله مش علشان ترتاحي بس،
لكن علشان تربي شخص يعرف يعتمد على نفسه في المستتقبل

وفي وسط كل ده… ما تنسيش تطلبي المساعدة من ربنا.
ممكن تجربي كل النصايح، وكل الخطوات،
بس من غير توفيقه وسنده… عمرك ماهتتخلصي من الضغط 

لو حابة تكملي المشوار ده بشكل أعمق،
وتعيشي أمومة حقيقية، وتبقي النسخة الأفضل من نفسك،
وتربّي أولادك تربية سليمة… وتبني بيت متوازن ومستقر،

بدعوكي للاشتراك في البرامج اللي بقدمها اللي بتساعدك تعيشي تجربة أمومة حقيقة
(أمومة حقيقة – مدبر الأمر – Super power – اجتماعات العائلة + دستور شجرة العائلة )