أزاي تقضي مع أولادك اقل وقت بأعلى فايدة و نتيجة ؟

بالرغم من الشغل و ضغط الوقت

 و الشعور بالذنب لضيق الوقت المتبقي لأولادك إلا إن حق أولادك لا يتعلق ابداً بالساعات اللي فيها تشتت و البال مشغول بحاجات تانية غير الولاد .. ولكن أشباعهم بالحب و الأهتمام يتلعق باللحظات الصادقة من القلب للقلب .

هل بتلاقي نفسك آخر اليوم مش عارفة تنامي بالليل و انت بتعيدي عرض اليوم وتسألي نفسك و تفكري  إذا كنت أعطيت أولادك ما يكفي من الوقت و الأهتمام؟ 

الوالدين اللي بيشتغلوا بيكون عندهم شعور بعدم الكفاية لان الوقت اللي بيقعدوه مع الولاد قليل جدا 

و دايما بيكون في تعارض ما بين الشغل و نكون حاضرين وداعمين للأولاد وقت حاجتهم لينا .

💫لكن حابة أطمنكم أن قوة علاقتكم بأولادكم لا تقاس بطول الوقت اللي بتقضوه معاهم و لكن بجودة الوقت حتي لو قليل 💫

وقت قليل مع انتباه كبير و تركيز و اهتمام من القلب بيوصل لقلب الاولاد و يملأهم حب و صلة و ترابط بينكم .

✨في أسطورة لازم نكسرها أن التواجد مع الاولاد طول اليوم يضمن لهم الاهتمام و الاحتواء و السعادة و النزول للشغل بيسبب تعاسة للأولاد

⛔ابداااا مش شرط 

طول اليوم الانشغال عالي جدا بمسؤوليات البيت و تجهيز الأكل و المشتتات شغالة في التلفزيون المفتوح و الموبايلات و متابعة السوشيال ميديا و لو في شغل بيتعمل من البيت و الرد علي الايميلات ..كل التواجد مع الاولاد في البيت مهما كان عدد ساعات طويلة لا يثمن و لا يغني من جوع الاولاد للانتباه الصافي و التركيز معاهم باهتمام من القلب بوقت خاص 10 دقايق يوميا فيهم كل البركة و الشفا لعلاقتكم بأولادكم بإذن الله .

مهم يكون عندنا وعي بالضغط اللي بيتحط من المجتمع علي الصورة المثالية للتواجد باستمرار مع الاولاد و نتعامل بأمومة حقيقية تسمح لنا بالتوازن ما بين أحتياجتنا الخاصة للنمو و العمل و الازدهار و احتياجات الاولاد للتواجد و اشباع الحب و الأهتمام الخاص و التوجيه و التربية .

ما هي فوائد الانتباه و التركيز للأولاد في وقت قليل مع ضغوط العمل؟ :

 * زيادة الشعور بالأمان والحب

 * تحسين مهارات التواصل 

 * تعزيز احترام الذات

 * رابطة أقوى مع الوالدين

و بالتالي التعاون بيزيد و استجابة الاولاد للتوجيه و التربية بيتحسن .

* وما هي فوائد الاهتمام بتركيز في وقت قليل للآباء و الأمهات المشغولين؟:

 * تقليل الشعور بالذنب و تأنيب الضمير

 * زيادة السعادة و التواصل المستمر

 * اتصال أعمق مع أولادك يوميا

 ✅طرق عملية لتنفيذ الانتباه بتركيز للأولاد  حتى مع جدول مزدحم 

1: تقدير قوة اللحظات الصغيرة: 

 مش لازم ننتظر وقت مناسب و نخطط له مع الولاد 

 ممكن نستفيد من اي فرصة للاستماع للأولاد أثناء ركوب السيارة بدون ما ننشغل بالرد علي الموبايل أو أي مشتتات .

 ممكن فرصة وقت تناول العشاء آخر اليوم  حتى لو كان لمدة 15 دقيقة هتعمل فرق كبيير المهم بدون مشتتات .

 الانتباه لفرصة إشراكهم في محادثة حقيقية وليس مجرد سلام سطحي سريع .

نقدر نقتنص اللحظات خلال اليوم مع الروتين العادي بدون الانتظار للتفرغ التام علشان نشعر بأولادنا و نوصلهم الحب الحقيقي اللي في قلبنا ليهم لكن عليه طبقات من تأنيب الضمير و الشعور بالذنب و الانتظار لتفريغ الوقت المناسب. 

2: فن قول «لا» للمهام اللي ممكن تتأجل و نقعد مع الاولاد شوية :

 *  إعطاء الأولوية للأولاد وقت قليل مخصص لكل طفل يوميا لأن المهام مش بتخلص لكن فرصة التواصل باولادنا وحماية وقتهم معانا هتخلص و مش هنعرف نتواصل بسهولة معاهم لو كبروا متعودين علي البعد و الوقت فات نقربهم .

 * ممكن اقتراح طرق لتفويض المهام أو ظبط حدود في العمل تساعد التوازن بين البيت و الولاد و الشغل .

 * تحديد أنشطة من اليوم بدون موبايلات تماما للكبار و الصغار زي وقت الأكل ووقت النوم فرصة حلوة للتواصل .

* حقيقي مقدرة جدا ان الوقت ضيق و الشغل بيضغطنا و ممكن نرجع البيت صفر طاقة و تحقيق التوازن مش سهل دائمًا لكن بالاستعانة بمدبر الأمر لتدبير أمورنا و ضبط أولويتنا و تجديد طاقتنا هيكون دايما في طرق مناسبة لتطبيق الحلول العملية اللي ذكرتها و بركة في الوقت تكفي الاولاد و الشغل بإذن الله.